नेपालले आईसीसी क्रिकेट विश्वकप लिग–२ अन्तर्गत सोमबार भएको खेलमा स्कटल्याण्डलाई ६ विकेटले पराजित गर्दै अंक तालिकामा महत्वपूर्ण छलाङ मारेको छ। कीर्तिपुरस्थित त्रिवि क्रिकेट मैदानमा भएको खेलमा नेपालले १९५ रनको लक्ष्य ३८.१ ओभरमा चार विकेट गुमाएर पूरा गरेको हो।

यस जितसँगै नेपाल २२ अंकसहित लिग–२ को पाँचौँ स्थानमा पुगेको छ। समान अंक भएको नामिबियालाई नेपालले नेट रनरेटमा पछि पारेको हो। नेपालले हालसम्म २७ खेल खेल्दा १० जित र १५ हार बेहोरेको छ भने दुई खेल रद्द भएका थिए।

नेपालको जितमा कप्तान रोहित पौडेलले उत्कृष्ट प्रदर्शन गर्दै ७४ रनको अर्धशतकीय इनिङ खेले। उनले ९८ बल सामना गर्दै पाँच चौका र दुई छक्का प्रहार गरे। इशान पाण्डेले पनि ५५ रनको योगदान दिए। उनले ६१ बलमा पाँच चौका र दुई छक्का प्रहार गर्दै कुशल भुर्तेलसँग दोस्रो विकेटका लागि १०४ रनको साझेदारी गरे।

ओपनर आशिफ शेखले २९ रन बनाउँदा कुशल भुर्तेलले २८ रन जोडे। यी दुईले पहिलो विकेटका लागि ५८ रनको साझेदारी गर्दै नेपाललाई राम्रो सुरुआत दिलाएका थिए।

स्कटल्याण्डका बलर मार्क वाटले दुई विकेट लिए भने ब्रान्डन म्याकमुलेनले एक विकेट हात पारे।

त्यसअघि टस हारेर पहिले ब्याटिङ गरेको स्कटल्याण्ड ३९.१ ओभरमा सबै विकेट गुमाउँदै १९४ रनमा समेटिएको थियो। टोलीका लागि ब्रान्डन म्याकमुलेनले आक्रामक ब्याटिङ गर्दै ७३ रन बनाए। उनले ४४ बलमा ६ चौका र ६ छक्का प्रहार गरे। कप्तान रिचि बेरिंगटनसँग उनले तेस्रो विकेटका लागि ४२ रनको साझेदारी गरेका थिए।

माइकल इंग्लिसले अविजित ५१ रन बनाउँदै टोलीलाई सम्मानजनक योगफलतर्फ डोर्‍याए। उनले ७१ बलमा चार चौका र एक छक्का प्रहार गरे। जर्ज मुन्सीले २१ रन तथा मार्क वाटले २० रन बनाए।

नेपालका बलरमध्ये ललित राजवंशी सर्वाधिक सफल रहे। उनले चार विकेट लिए। सन्दीप लामिछानेले तीन विकेट झारे भने सोमपाल कामी, नन्दन यादव र दीपेन्द्र सिंह ऐरीले समान एक–एक विकेट लिए।

हारका बाबजुद स्कटल्याण्ड ३८ अंकसहित तालिकाको शीर्ष स्थानमा कायम रहेको छ।