सुदूरपश्चिम अपराजित रहँदै प्लेअफमा, जनकपुर अंकविहीन

सुदूरपश्चिम अपराजित रहँदै प्लेअफमा, जनकपुर अंकविहीन

काठमाडौँ । सुदूरपश्चिम रोयल्स अपराजित रहँदै नेपाल प्रिमियर लिग एनपीएल टी २० क्रिकेटको प्लेअफमा पुग्ने पहिलो टिम बनेको छ । साविक विजेता जनकपुर बोल्ट्सलाई ६ विकेटले हराउँदै प्लेअफमा पुगेको हो । १४६ रनको चुनौती सुदूरले १७ ओभर ४ बलमै ४ विकेट गुमाएर पूरा गरेको हो । इशान पाण्डेले ३५ बलमा ५६, विनोद भण्डारीले ४९ बलमा ४२ तथा हर्मित सिंहले १० बलमा अविजित रहँदै २५ रन बनाए ।

यसअघि खेलमा जनकपुरले टस जितेर पहिले ब्याटिङ गर्दै ८ विकेटको क्षतिमा १४५ रन बनायो । सन्जय कृष्णमूर्तीले ३८ बलमा ५० तथा जान निकोल लोफ्टि इटनले ३३ बलमा ३९ रन बनाए । अभिनाश बोहराले ४ तथा स्कट कुग्ग्लेजिनले ३ विकेट लिए । यो हारसँगै अंकविहीन जनकपुर प्लेअफ होडबाट लगभग बाहिरिएको छ ।

जनकपुरले नियमित कप्तान अनिल साहलाई कप्तानबाट हटाएर दक्षिण अफ्रिकी खेलाडी वाइने पार्नेललाई कप्तान बनाएको छ । पार्नेल पहिलो विदेशी कप्तान बने पनि टिमलाई जिताउन भने सकेनन् ।

अंक तालिका
आठ टिम सहभागी एनपीएलमा अहिलेसम्म सुदूरपश्चिममात्र अपराजित रहेको छ । सुदूरले खेलेका पाँच ओटै खेल जितेको छ । सुदूर प्लेअफमा पुग्ने पहिलो टिम बनेको छ । विराटनगरले पाँच खेल खेलेकामा चार खेल जितेर ८ अंकसहित दोस्रो स्थानमा छ ।

काठमाडौँ गोर्खाज ५ खेलमा ६ अ‌कसहित तेस्रो स्थानमा छ । चितवन राइनोज ४ खेलबाट ४ अ‌कसहित चौथो स्थानमा छ । लुम्बिनी ५ खेलमा ४ अंकसहित पाँचौँ स्थानमा पुगेको छ ।

कर्णालीले चारमध्ये एक खेल जितेर छैटौँ स्थानमा छ । पोखरा चार खेलमा एक खेल जितेर २ अंकसहित सातौँ स्थानमा छ ।

साविक विजेता जनकपुरमात्र ४ खेलबाट अंकविहीन छ ।