काठमाडौंको मनमैजु क्षेत्रमा हात्तीको दाह्रा बिक्री वितरण गर्ने तयारी भइरहेको सूचनाका आधारमा प्रहरीले ५ जनालाई पक्राउ गरेको छ। काठमाण्डु उपत्यका अपराध अनुसन्धान कार्यालयको टोलीले विशेष छापा मारेर उनीहरूलाई नियन्त्रणमा लिएको हो।

पक्राउ पर्नेमा काठमाण्डुका २५ वर्षीय राजिव महर्जन, २६ वर्षीय टेकप्रसाद गुरुङ, २७ वर्षीय आयुष महर्जन, २४ वर्षीय पुरन बोहरा र २० वर्षीय सन्तबहादुर भुजेल रहेका छन्।

प्रहरीका अनुसार राजिव महर्जनको घर नजिकैको खाली जग्गामा गाडेर राखिएको अवस्थामा दुई थान हात्तीका दाह्रा फेला परेको थियो। ती दाह्रा राष्ट्रपति कार्यालयबाट चोरी भएको हुनसक्ने प्रारम्भिक निष्कर्ष पनि प्रहरीले सार्वजनिक गरेको छ। गत भदौ २३ र २४ गते भएको जेनजी आन्दोलनका क्रममा राष्ट्रपति निवासमा तोडफोड र आगजनी भएको घटनासँग यो विषय जोडिएको बताइएको छ।

त्यस्तै, पक्राउ परेकाहरूको साथबाट लागुऔषध ट्रामाडोलका १५० ट्याब्लेट समेत बरामद गरिएको प्रहरीले जनाएको छ। उनीहरूविरुद्ध लागुऔषध नियन्त्रण ऐन २०३३ र राष्ट्रिय निकुञ्ज तथा वन्यजन्तु संरक्षण ऐन २०२९ अनुसार थप अनुसन्धान तथा कानुनी प्रक्रिया अघि बढाइएको छ।