बागलुङ — राष्ट्रिय स्वतन्त्र पार्टी (रास्वपा) बागलुङको पहिलो जिल्ला अधिवेशन जेठ २३ गते गलकोट बजारमा हुने भएको छ। यसअघि जेठ २४ गतेका लागि तय गरिएको अधिवेशन अब एक दिन अघि सारेर जेठ २३ गते नै गर्ने निर्णय गरिएको हो।

जिल्ला सभापति महेन्द्र खड्काका अनुसार केन्द्रीय सर्कुलरअनुसार जेठ २४ गते जिल्लाको रिपोर्टिङ गर्ने मिति तोकिएको भए पनि प्रदेश समितिको पछिल्लो निर्णयपछि सबै जिल्लाको अधिवेशन जेठ २३ भित्रै सम्पन्न गर्न निर्देशन दिइएकाले मिति परिवर्तन गरिएको हो।

“हामीले जेठ २४ गतेसम्म गरेर रिपोर्टिङ गर्न सकिन्छ भन्ने धारणा राखेका थियौं, तर प्रदेश समितिले सबै जिल्लाको अधिवेशन २३ गतेभित्रै सम्पन्न गर्नुपर्ने सर्कुलर जारी गरेपछि सोही अनुसार मिति तय गरिएको हो,” सभापति खड्काले जानकारी दिनुभयो।

अधिवेशनको तयारी तीव्र रूपमा भइरहेको छ। रास्वपाका अनुसार बागलुङका ८५ मध्ये ७० वडा र १० मध्ये ७ स्थानीय तहमा अधिवेशन सम्पन्न भइसकेका छन्। बाँकी वडा तथा स्थानीय तहका अधिवेशन पनि छिट्टै सम्पन्न गर्ने तयारी भइरहेको छ।